Í sveitarstjórnarkosningunum í maí árið 2014 var kjörsókn í landinu minni en nokkru sinni fyrr. Á landinu öllu varð heildarkjörsóknin 66,5% og í þremur stærstu sveitarfélögum landsins var hún einungis um 60 prósent. Óhætt er að fullyrða að fáa hefði órað fyrir jafn mikilli minnkun kjörsóknar á jafn skömmum tíma. Að vísu hafði verið leitt að því líkum að hina dræmu kjörsókn í kosningunum árið 2010 mætti að einhverju leyti rekja til áhrifa frá bankahruninu árið 2008 og útgáfu Rannsóknarskýrslu Alþingis sem kom út sex vikum fyrir kosningarnar. Áframhaldandi fall kjörsóknar í ár (2014) kom engu að síður mjög mörgum á óvart. Í ljósi þessarar óheillavænlegu þróunar varð það úr að ráðist yrði í að gerð könnunar á kosningaþátttöku þar sem leitað yrði skýringa á þessari þróun – ekki síst hvað gæti skýrt hina dræmu kjörsókn vorið 2014.